habaru page ad two

މާލެތެރެއަށް ބުޅަލުގެ ނަޖިސް އެޅެން ދޫކުރާނެ އެއްވެސް އުޒުރެއް ސަރުކާރަށް ނުދެއްކޭނެ ކަމަށް ވިދާޅުވެ، ހުޅުމާލޭގައި ގާއިމުކޮށްފައިވާ ބުޅާ ފެސިލިޓީ މާލެ ސިޓީ ކައުންސިލާ ހަވާލުކުރުމަށް ދެ ފަހަރަށް އެދިފައިވާނެ ކަމަށް މާލޭގެ މޭޔަރު އާދަމް އާޒިމް މިއަދު ވިދާޅުވެއްޖެއެވެ.

މާލެ ސިޓީ ކައުންސިލުގެ މިއަދުގެ ރަސްމީ އާންމު ޖަލްސާގައި ވާހަކަދައްކަވަމުން މޭޔަރު ވިދާޅުވީ، ބުޅާތައް ގެންދަން ފަރުކޮޅުފުށީގައި އެޅި ބުޅާ ފެސިލިޓީ "އޮޅު ހިޔާ" ހަވާލުކުރުމަށް އެދި މިނިސްޓްރީ އޮފް އެގްރިކަލްޗާ އެންޑް އެނިމަލް ވެލްފެއާއަށް ދެ ފަހަރަށް ސިޓީ ފޮނުވާފައިވާނެ ކަމަށެވެ. މާލޭގެ މަގުތަކުގައި ބުޅާ ގިނަވެ، ނަޖިހުގެ މައްސަލަ ބޮޑުވެފައިވާތީ ސިޓީ ކައުންސިލުން އެ ފެސިލިޓީ ހެދީ މާލޭގައި އުޅޭ ހުރިހާ ބުޅާތަކެއް އެތަނުގައި ބެލެހެއްޓޭނެ ފެންވަރަށް ކަމަށް އާޒިމް ފާހަގަކުރެއްވިއެވެ.

"އެއްވެސް އުޒުރެއް މިއަދަކު ނުދެއްކޭނެ މާލެ ތެރެއަށް ބުޅާ ނަޖިސް އަޅަން ދޫކުރާކަށެއް. ސަރުކާރަށް ވެސް ނުދެއްކޭނެ. [ފެސިލިޓީ ހިންގަން ހަވާލުކުރި ފަރާތް] އެ ފަރާތަށް ވެސް ނުދެއްކޭނެ. އެ ފަރާތަށް ނުވަންޏާ ހަވާލުކުރަންވީ މިއަދު ވެސް،" މޭޔަރު ވިދާޅުވިއެވެ.

މި ޖަލްސާގައި ގަލޮޅު އުތުރު ދާއިރާގެ ކައުންސިލަރު މުހައްމަދު ސައިފް ފާތިހު ވަނީ މާލޭގެ މަގުތަކުގައި ބުޅަލުގެ ނަޖިސް ގިނަވުމުގެ ސަބަބުން އާންމުން ކުރަމުންދާ ޝަކުވާތަކާ ގުޅިގެން ކަންބޮޑުވުން ފާޅުކުރައްވާފައެވެ. ސައިފް ވިދާޅުވީ، އެ ފެސިލިޓީއަށް އެގްރިކަލްޗާ މިނިސްޓްރީން އެންމެ 30 ބުޅާ ލައިގެން 'ބަލަހައްޓައިގެން' ތިބުމަކީ މައްސަލައަށް އޮތް ހައްލެއް ނޫން ކަމަށެވެ.

"މި ވާހަކަ ދެއްކީމާ ވިދާޅުވަނީ އެ ފެސިލިޓީ ހުރީ ރެޑީއަކަށް ނޫނޭ. މާލޭގެ މަގުމަތި އެ ހުރީ ބުޅާ ގުއިރޭން ރެޑީއަށްތޯ؟ އެ ފެސިލިޓީ ހުރީ އެންމެ ފުރިހަމައަކަށް ނޫން ކަމަށް ބުނާއިރު، މަގުތައް އެ ހުރީ އެންމެ ފުރިހަމައަށްތޯ ބުޅާ ވިހައިގެން އުޅެން؟" ސައިފް ސުވާލު އުފެއްދެވިއެވެ.

މާލެ ސިޓީ ކައުންސިލުގެ ޚަރަދުގައި ހެދި މި ފެސިލިޓީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހުޅުއްވައިދެއްވީ ނޮވެންބަރު 2024 ގައެވެ. އެތަން ހިންގުމަށް އެގްރިކަލްޗާ މިނިސްޓްރީއާ ހަވާލުކުރި ނަމަވެސް، މޭޔަރު ވިދާޅުވީ އެތަން ބަލަހައްޓާ ފަރާތުން އަމަލުކުރަނީ ވަރަށް ޒިންމާދާރުކަން ކުޑަ ގޮތަކަށް ކަމަށެވެ. މީގެ ކުރިން ބުޅަލުގެ ހައްގުގައި ވަކާލާތު ކުރި ފަރާތްތަކުން މިއަދު އެ ޒިންމާ ނުނަގައި ބުޅާ ނަޖިސް ނުނަގާ ކަމަށް ބުނުމަކީ ބަލައިގަނެވޭނެ ކަމެއް ނޫން ކަމަށް އޭނާ ވިދާޅުވިއެވެ.

މިދިޔަ އަހަރުގެ މެއި މަހު އެނިމަލް ވެލްފެއާ މިނިސްޓަރު ޑރ. މަރިޔަމް މާރިޔާ ވިދާޅުވި ގޮތުގައި، މި ފެސިލިޓީއަށް ނޮން-ރިކަރަންޓް ޚަރަދުގެ ގޮތުގައި 1.2 މިލިއަން ރުފިޔާ ޚަރަދުވާނެއެވެ. ނަމަވެސް، މި ބޮޑު ޚަރަދާއެކުވެސް މާލޭގެ މަގުމަތީގައި އުޅޭ ބުޅަލުގެ މައްސަލައަށް އަދިވެސް އެދެވޭ ހައްލެއް ލިބިފައެއް ނުވެއެވެ.

މާލެ ތެރެއަށް ބުޅަލުގެ ނަޖިސް އެޅެން ދުލެއް ނުކުރާނަން، ފެސިލިޓީ ހަވާލުކުރަން 2 ފަހަރަށް އެދެފިން: މޭޔަރު

މާލެއާއި ހުޅުމާލެއާ ދެމެދު މީރު ފެން ދައުރުކުރެވޭ ގޮތަށް ޤާއިމުކޮށްފައިވާ ފެނުގެ ވިއުގަ، އިމަރޖެންސީ ހާލަތްތަކުގައި ބޭނުންކުރެވޭ މިންވަރަށް މިހާރު ނިމިފައިވާ ކަމަށް އެމްޑަބްލިޔުއެސްސީގެ މެނޭޖިންގ ޑިރެކްޓަރ ޢަބްދުލް މަތީން މުޙައްމަދު ވިދާޅުވެއްޖެއެވެ.

ޕީއެސްއެމް ނިއުސްގެ "ރާއްޖެ މިއަދު" ޕްރޮގްރާމްގައި ވާހަކަދައްކަވަމުން މަތީން ވިދާޅުވީ، މާލެއާއި ހުޅުމާލެ ފެނުގެ ވިއުގައަކުން ގުޅާލުމަށްޓަކައި ސިނަމާލެ ބުރިޖުގެ އަރިމަތީގައި އަޅާފައިވާ ހޮޅި މިހާރު ބޭނުންކުރެވޭ ހާލަތަށް ގެނެވިފައިވާ ކަމަށެވެ. މި މަޝްރޫޢަކީ 2018 ވަނަ އަހަރު ސިނަމާލެ ބުރިޖު ހުޅުވުމާއެކު ފެށި މަސައްކަތެއް ނަމަވެސް، ފާއިތުވި ފަސް އަހަރުގެ ތެރޭގައި މި މަސައްކަތް އެދެވޭ ގޮތެއްގައި ކުރިއަށް ގޮސްފައިނުވާކަން އޭނާ ފާހަގަކުރެއްވިއެވެ.

ނަމަވެސް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގަތުމަށްފަހު، މި ސަރުކާރުން އިސްނަގައިގެން ވަނީ މި މަސައްކަތް އަލުން ބާރުސްޕީޑުގައި ފަށާފައެވެ. މަސައްކަތް ލަސްވުމާ ގުޅޭގޮތުން މަތީން ވިދާޅުވީ، މީގެ ކުރިން މަސައްކަތް މަޑުޖެހިފައި އޮތީ މާލެއާއި ހުޅުމާލެއާ ދެކޮޅުގައިވެސް ގާއިމްކުރަންޖެހޭ ޕަންޕު ސްޓޭޝަންތަކުގެ މަސައްކަތް ނުނިމި އޮތުމުން ކަމަށެވެ.

"މިހާރު އިމަރޖެންސީ ހާލަތެއް މެދުވެރިވެއްޖެނަމަ، މި ހޮޅި ބޭނުންކޮށްގެން ދެ ސިޓީގެ ދެމެދުގައި ފެން ފޯރުކޮށްދެވޭނެ ފެންވަރަށް މަސައްކަތް ވަނީ ނިންމާލެވިފައި،" މަތީން ވިދާޅުވިއެވެ.

މި ވިއުގަ މެދުވެރިކޮށް މާލެއާއި ހުޅުމާލެ ގުޅާލުމުން، ދިމާވާ ކުއްލި ނުރައްކަލުގެ ހާލަތްތަކުގައި އެއް ރަށުން އަނެއް ރަށަށް ފެން ފޯރުކޮށްދިނުމުގެ މަގު ފަހިވެ، ފެނުގެ ރައްކާތެރިކަން އިތުރަށް ކަށަވަރުވެގެންދާނެއެވެ.

މާލެއާއި ހުޅުމާލޭގެ ފެނުގެ ވިއުގަ އެމަރޖެންސީގައި ބޭނުން ކުރެވޭ ވަރަށް ނިމިއްޖެ

އޭޝިޔާގެ އެންމެ މުއްސަނދި މަހުޖަނު މުކޭޝް އަމްބާނީގެ ހަގު ފިރިހެން ދަރިފުޅު އާނަންތު އަމްބާނީ އާއި އޭނާގެ އަންހެނުން ރާދިކާ މާޗަންޓު ޗުއްޓީ ހޭދަކުރުމަށް އަނެއްކާވެސް ރާއްޖެ އަތުވެއްޖެއެވެ.

ޓޫރިޒަމް ދާއިރާގެ ޚަބަރުތައް ގެނެސްދޭ "ހޮޓެލިއާ މޯލްޑިވްސް" އިން ރިޕޯޓުކޮށްފައިވާ ގޮތުގައި، މި ދެމަފިރިން މިފަހަރުގެ ޗުއްޓީ ހޭދަކުރަމުންދަނީ ރާއްޖޭގެ އެންމެ މަތީ ފަންތީގެ ރިސޯޓުތަކުގެ ތެރޭގައި ހިމެނޭ ވޯލްޑޯފް އެސްޓޯރިއާ މޯލްޑިވްސް އިތާފުށީގައެވެ.

މި ދެމަފިރިންނަކީ ދާދި ފަހުން 2024 ވަނަ އަހަރުގެ ނޮވެމްބަރު މަހުވެސް ރާއްޖޭގައި ޗުއްޓީ ހޭދަކުރި ބައެކެވެ. އެ ފަހަރު އާނަންތު އާއި ރާދިކާ މަޑުކުރީ ހދ. މަކުނުދޫ ފަޅުގައި އަލަށް ހުޅުވި ސޮނެވާ ސީކްރެޓް ރިސޯޓުގައެވެ.

މި ދަތުރުގައިވެސް އެ ދެމަފިރިންގެ ސަލާމަތީ ކަންކަން ވަނީ ވަރަށް ވަރުގަދަކޮށްފައެވެ. ހޮޓެލިއާ މޯލްޑިވްސްއިން ބުނި ގޮތުގައި، އެ ދެމަފިރިންގެ ސަލާމަތީ ކަންކަން ބެލެހެއްޓުމަށްޓަކައި 50 މީހުންގެ ޓީމެއް ރާއްޖެ ގެނެސްފައިވެއެވެ. މީގެ އިތުރުން، ކުއްލި ހާލަތެއްގައި ބޭނުންކުރުމަށްޓަކައި ދެ ސީޕްލޭން އަބަދުވެސް ރިސޯޓުގައި ތައްޔާރީ ހާލަތުގައި (ސްޓޭންޑްބައިގައި) ބާއްވާފައިވާ ކަމަށްވެސް އެ ނޫހުން ރިޕޯޓުކޮށްފައިވެއެވެ.

އާނަންތު އަމްބާނީގެ ބައްޕަ، މުކޭޝް އަމްބާނީއަކީ ފޯބްސްގެ ތަފާސްހިސާބުތަކަށް ބަލާއިރު ދުނިޔޭގެ 18 ވަނައަށް އެންމެ މުއްސަނދި މީހާއެވެ. އަދި އޭނާއަކީ މުޅި އޭޝިޔާ ބައްރުގައިވެސް ހުރި އެންމެ މުއްސަނދި ފަރާތެވެ. އޭނާގެ މިލްކިއްޔާތުގެ އަގު ގާތްގަނޑަކަށް 92.5 ބިލިޔަން ޑޮލަރަށް އަރައެވެ.

އަމްބާނީ އާއިލާގެ މެންބަރުންނަކީ އާންމުކޮށްވެސް ޗުއްޓީ ހޭދަކުރުމަށް ރާއްޖެއަށް ޒިޔާރަތްކުރާ ބައެކެވެ. މިފަދަ ނުފޫޒުގަދަ ޝަޚުޞިއްޔަތުތައް ރާއްޖެ އައުމަކީ ރާއްޖޭގެ ފަތުރުވެރިކަމަށް ލިބޭ ވަރަށް ބޮޑު އިޝްތިހާރެކެވެ.

އަމްބާނީގެ ދެމަފިރިން އަނެއްކާވެސް ރާއްޖޭގައި: މިފަހަރު ޗުއްޓީ ހޭދަކުރަނީ އިތާފުށީގައި

އަންނަ ހަފްތާގައި ދިރާސީ އާ އަހަރުގެ ކިޔެވުން ފެށޭއިރު، މިއަހަރު އަލަށް ގްރޭޑް އެކަކަށް ވައްދާފައިވާ ދަރިވަރުންގެ އަދަދު 4،000 އަށްވުރެ މައްޗަށް އަރާފައިވާ ކަމަށް ތައުލީމީ ވުޒާރާއިން ހާމަކޮށްފިއެވެ.

ތައުލީމީ ވުޒާރާއިން އާންމުކޮށްފައިވާ ތަފާސްހިސާބުތަކަށް ބަލާއިރު، މި އަހަރުގެ ދިރާސީ އާ އަހަރަށް ގްރޭޑް 1 އަށް ޖުމްލަ 4,790 ދަރިވަރުން ވަނީ ވައްދާފައެވެ. މީގެ ތެރޭގައި ހިމެނެނީ މާލެ ސަރަހައްދުގެ ސްކޫލުތަކަށް އަލަށް ވައްދާފައިވާ 1,748 ދަރިވަރުންނާއި، އަތޮޅުތެރޭގެ ސްކޫލުތަކަށް ވެއްދި 3,042 ދަރިވަރުންނެވެ.

ސްކޫލުތައް ބަދަލުވުމާ ގުޅޭގޮތުން އެ ވުޒާރާއިން ވިދާޅުވީ، މިއަހަރު އަތޮޅުތަކުގެ ސްކޫލުތަކުން މާލޭގެ ސްކޫލުތަކަށް 1,530 ކުދިން ބަދަލުވެފައިވާ ކަމަށެވެ. އަދި މާލޭގެ ސްކޫލުތަކުން ހުޅުމާލޭގެ ސްކޫލުތަކަށް 836 ކުދިން ބަދަލުވެފައިވާކަން ވެސް ތައުލީމީ ވުޒާރާއިން ފާހަގަކުރެއްވިއެވެ.

މި އަހަރުގެ ދިރާސީ އަހަރުގެ ކިޔެވުން ރަސްމީކޮށް ފެށުމަށް ހަމަޖެހިފައިވަނީ މި މަހުގެ 27 ވާ އާދިއްތަ ދުވަހުއެވެ.

އެކަޑަމިކް ކަލަންޑަރުގައިވާ ގޮތުން، މި ފެށޭ ދިރާސީ އަހަރުގެ ފުރަތަމަ ޓާމުގެ މިޑް ބްރޭކް ދަރިވަރުންނަށް ލިބޭނީ މެއި މަހުގެ 24 އިން 30 ގެ ނިޔަލަށެވެ. އަދި ފުރަތަމަ ޓާމުގެ ކިޔެވުން ނިންމައި ދަރިވަރުން ޗުއްޓީއަށް ދާނީ ޖުލައި މަހުގެ 17 އިން އޮގަސްޓް މަހުގެ 1 ވަނަ ދުވަހުގެ ނިޔަލަށެވެ.

ދެވަނަ ޓާމުގެ ކިޔެވުން އޮގަސްޓް މަހުގެ 2 ވަނަ ދުވަހު ފެށޭއިރު، މި އަހަރުގެ ކިޔެވުން އެއްކޮށް ނިމި ބޮޑު ޗުއްޓީ ދޭނީ ޑިސެމްބަރު މަހުގެ 18 އިން 2027 ވަނަ އަހަރުގެ ޖެނުއަރީ މަހުގެ 12 ވަނަ ދުވަހުގެ ނިޔަލަށެވެ. ތައުލީމީ ވުޒާރާއިން ކަނޑައަޅާފައިވާ ގޮތުގައި 2027 ވަނަ އަހަރުގެ ދިރާސީ އަހަރުގެ ކިޔެވުން ފެށޭނީ އެ އަހަރުގެ ޖެނުއަރީ މަހުގެ 17 ވަނަ ދުވަހުއެވެ.

މިއަހަރު ގްރޭޑް އެކަކަށް ވެއްދި ދަރިވަރުންގެ އަދަދު 4،000 އަށްވުރެ މައްޗަށް!

އިސްލާމްދީނަކީ އިންސާނީ އަޚްލާޤީ މިންގަނޑުތައް އެންމެ މަތިވެރި ދަރަޖައަށް ފަރުމާކޮށްދީފައިވާ ދީނެވެ. ތެދުވެރިކަމާއި އަމާނާތްތެރިކަމަކީ ކޮންމެ މުސްލިމެއްގެ ކިބައިގައި ހުރުން ލާޒިމު މާތް ސިފަތަކެކެވެ. މީހަކު އަނެކަކަށްވާ ވަޢުދަކީ ހަމައެކަނި ދޫމަތިން ބުނެލާ ބަސްތަކެއް ނޫނެވެ. އެއީ އޭނާގެ އަބުރާއި، އިންސާނީ ކަރާމާތާއި، އަދި އެންމެ މުހިންމުކޮށް އޭނާގެ އީމާންތެރިކަމާ ގުޅިފައިވާ އަމާނާތެކެވެ. ނަމަވެސް، ހިތާމައަކީ މިއަދުގެ މުޖުތަމަޢުން ފެންނަމުންދާ މަންޒަރު ތަފާތުވުމެވެ. ފުއްދޭނެކަމުގެ އެއްވެސް ޔަގީންކަމެއް ނެތް ނުވަތަ ނުފުއްދޭނެކަން އެނގިހުރެ ވަޢުދުވުމުގެ ނުބައި އާދަ ވަނީ އަޅުގަނޑުމެންގެ ތެރޭގައި އާންމު ބައްޔެއް ފަދައިން ފެތުރިފައެވެ.

ފުއްދުމުގެ ގާބިލުކަން ނެތް ވަޢުދުތައް ކުރުމަކީ އިސްލާމީ ނަޒަރަކުން ބަލާއިރު މުނާފިޤުންގެ ސިފައެކެވެ. ކީރިތި ރަސޫލާ ﷺ ވަނީ މުނާފިޤުންގެ ސިފަތައް ބަޔާންކޮށްދެއްވައި އެކަމުގެ އިންޒާރު ދެއްވާފައެވެ. އެކަލޭގެފާނުގެ ޙަދީޘްފުޅެއްގެ މާނައިގައިވަނީ، މުނާފިޤުންގެ ތިން ސިފައެއްވާ ކަމަށެވެ. އެއީ ވާހަކަދައްކައިފިނަމަ ދޮގުހެދުމާއި، ވަޢުދެއް ވެއްޖެނަމަ އެއާ ޚިލާފުވުމާއި، އަދި އަމާނާތެއް ހަވާލުކުރެވިއްޖެނަމަ އެއަށް ޚިޔާނާތްތެރިވުމެވެ. އެހެންކަމުން، ގަސްދުގައި ނުފުއްދޭނެ ވަޢުދުތައް ކުރުމަކީ މުސްލިމެއްގެ ކިބައިން ފެނިގެންވާނެ ސިފައެއް ނޫނެވެ. އެއީ އީމާންކަމުގެ ބަލިކަށިކަން ހާމަކޮށްދޭ ނުހަނު ނުބައި އަމަލެކެވެ.

މިކަމުގެ ނުރައްކާތެރިކަން ބަޔާންކުރައްވައި ކީރިތި ޤުރުއާނުގެ ސޫރަތުއް ޞައްފުގެ 2 ވަނަ އާޔަތާއި 3 ވަނަ އާޔަތުގައި މާތްﷲ ވަނީ ވަރަށް ވަރުގަދަ އިންޒާރެއް ދެއްވާފައެވެ. އެ އާޔަތުގެ މާނައިގައިވަނީ: "އޭ އީމާންވެއްޖެ މީސްތަކުންނޭވެ! ތިޔަބައިމީހުން ނުކުރާ ކަންތަކުގެ ވާހަކަ ތިޔަބައިމީހުން ބުނަނީ ކީއްވެގެން ހެއްޔެވެ؟ ތިޔަބައިމީހުން ނުކުރާ ކަންތައް (ކުރާނެކަމަށް) ބުނުމަކީ، ﷲ ގެ ހަޟްރަތުގައި ކޯފާ ބޮޑުވެގެންވާ ކަމެކެވެ." މި އާޔަތުން ދޭހަވަނީ ބަހާއި އަމަލު ދިމާނުވުމަކީ ހަމައެކަނި އަޚްލާޤީ މައްސަލައެއް ނޫން ކަމާއި، އެއީ މާތްﷲގެ ކޯފާ ހައްގުވާ ފަދަ ބޮޑު ފާފައެއް ކަމެވެ.

ވަޢުދަކީ މުޖުތަމަޢުގެ ބަހީލެވެ. އިންސާނުންގެ މެދުގައި އޮންނަ އިޖުތިމާޢީ ގުޅުންތަކާއި، ވިޔަފާރީގެ މުޢާމަލާތްތަކާއި، އާއިލީ މަސްލަހަތު ބިނާވެފައިވަނީ އެކަކު އަނެކަކަށް ކުރާ އިތުބާރުގެ މައްޗަށެވެ. ނުފުއްދޭނެ ވަޢުދުތައް ވުމަކީ މި ދެންނެވި އިތުބާރުގެ ބިންގާ ތަޅައިލެވޭ ކަމެކެވެ. ވަކިން ހާއްސަކޮށް، މިއަދު ސިޔާސީ މަޤްޞަދުތައް ޙާޞިލުކުރުމަށްޓަކައި "ވަޢުދު ފޮތްތައް" ޗާޕުކޮށްގެން ނެރެ، އޭގައިވާ ކަންކަން ފުއްދުމުގެ އެއްވެސް ނިޔަތެއް ނެތި ރައްޔިތުންނަށް އޮޅުވާލުމަކީ މުޅި މުޖުތަމަޢުގެ ފޭރާން ހަލާކުވެގެންދާ ކަމެކެވެ. އިސްލާމްދީން ބާރުއަޅަނީ އަމާނާތްތެރިވުމަށާއި ބަހާއި އަމަލު ސީދާކުރުމަށެވެ.

ޒިންމާދާރުކަމުގެ ގޮތުން ބަލާއިރު، ދުނިޔޭގައި އަހަރެމެންވާ ކޮންމެ ވަޢުދަކާ ބެހޭގޮތުން ޤިޔާމަތް ދުވަހުން ސުވާލު ކުރެވޭނެއެވެ. ސޫރަތުލް އިސްރާގެ 34 ވަނަ އާޔަތުގައި މާތްﷲ ވަނީ "ވަޢުދު ފުއްދާށެވެ! ހަމަކަށަވަރުން، ވަޢުދަކީ (އެއާމެދު ޤިޔާމަތް ދުވަހުން) ސުވާލު ކުރެވޭނޭ ކަމެކެވެ." މިފަދައިން އަންގަވާފައެވެ. އެހެންކަމުން، އެދުވަހުގެ ހިސާބުކިތާބަށް ތައްޔާރުވުމުގެ ގޮތުންވެސް، އަހަރެމެންގެ ދުލުން ބޭރުވާ ކޮންމެ ބަހަކަށާއި، ވެވޭ ކޮންމެ ވަޢުދަކަށް ރައްކާތެރިވާންޖެހެއެވެ.

ޚުލާޞާކޮށް ދަންނަވާނަމަ، ތިމާގެ ކިބައިގައި ކުޅަދާނަކަން ނެތް ކަންކަމުގައި ވަޢުދުވުމަކީ ދީނީ ގޮތުން ނަހީކުރައްވާފައިވާ، އަދި އޭގެ ސަބަބުން ދުނިޔެއާއި އާޚިރަތުގައިވެސް ގެއްލުން ހުރި ކަމެކެވެ. މުސްލިމަކު ވާންޖެހޭނީ ބުނާ ބަހުގައި ތެދުވެރި، ވަޢުދު ފުއްދާ މީހަކަށެވެ. އެހެންކަމުން، ކަމަކަށް ވަޢުދުވުމުގެ ކުރިން އެކަމަކީ ތިމާއަށް ކުރެވޭނެ ކަމެއްތޯއާއި، އެކަމުގެ ޤާބިލުކަން ތިމާގެ ކިބައިގައި ހުރިތޯ ފުންކޮށް ވިސްނާލުމަކީ ކޮންމެހެން މުހިންމު ކަމެކެވެ. އަމާނާތްތެރި މުޖުތަމަޢެއް ބިނާކުރެވޭނީ ވަޢުދުގެ މަތިވެރިކަން ދަންނަ ބަޔަކަށް އަހަރެމެން ވެގެންނެވެ.

ވައުދުވުމާއި އޭގެ އަމާނާތްތެރިކަން: އިސްލާމީ ނަޒަރަކުން

ރާއްޖެއިން ސީޝެލްސްއަށް ކަނޑައަޅުއްވާފައިވާ ސަފީރު މަސްއޫދު އިމާދު، ސަފީރުކަމުގެ ފަތްކޮޅު އެގައުމުގެ ރައީސް ޑރ. ޕެޓްރިކް ހަރމިނީއަށް މިއަދު އަރުވައިފިއެވެ.

މި ރަސްމިއްޔާތު އޮތީ ސީޝެލްސްގެ ވިކްޓޯރިއާގައި ހުންނަ ރިޔާސީ ގަނޑުވަރުގައެވެ. ފަތްކޮޅު އެރުވުމަށްފަހު ބޭއްވުނު ބައްދަލުވުމުގައި، ސަފީރު މަސްއޫދު ވަނީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ފަރާތްޕުޅުން ސީޝެލްސްގެ ރައީސަށާއި އެގައުމުގެ ރައްޔިތުންނަށް ހެޔޮއެދުމާއި ތަހުނިއްޔާ އަރިސްކުރައްވާފައެވެ.

މި ބައްދަލުވުމުގައި ވާހަކަދައްކަވަމުން ސަފީރު މަސްއޫދު ވަނީ ސީޝެލްސް ސަރުކާރުން އެމަނިކުފާނަށް ވިދާޅުވި ހޫނު މަރުހަބާއަށްޓަކައި ޝުކުރު އަދާކުރައްވާފައެވެ. އަދި އެމަނިކުފާނުގެ ސަފީރުކަމުގެ ދައުރުގައި ދެ ގައުމުގެ ދެމެދުގައި އޮތް ގުޅުން އިތުރަށް ބަދަހިކުރެއްވުމަށް މަސައްކަތް ކުރައްވާނެ ކަމުގެ ޔަގީންކަން ދެއްވިއެވެ. ޚާއްޞަގޮތެއްގައި ދެ ގައުމަށްވެސް މުހިންމު ދާއިރާތައް ކަމަށްވާ މަސްވެރިކަމާއި، ފަތުރުވެރިކަމުގެ އިތުރުން ވިޔަފާރީގެ ދާއިރާއިން ގުޅުން ބަދަހިކުރުމުގެ މުހިންމުކަން ސަފީރު ފާހަގަކުރެއްވިއެވެ.

ސީޝެލްސްގެ ރައީސް ޑރ. ޕެޓްރިކް ހަރމިނީ ވަނީ ސަފީރު މަސްއޫދަށް މަރުހަބާ ދަންނަވައި، ދެ ގައުމުގެ ދެމެދުގައި އޮތް ގާތް ގުޅުން ސަފީރުގެ ދައުރުގައި އިތުރު އުސްމިންތަކަކަށް ދާނެ ކަމަށް އުއްމީދު ކުރައްވާ ކަމަށް ވިދާޅުވެފައެވެ.

ފަތްކޮޅު އެރުވުމުގެ ރަސްމިއްޔާތަށްފަހު، ސަފީރު މަސްއޫދު ވަނީ ސީޝެލްސްގެ ނައިބު ރައީސް ސަބޭސްޓިއަސް ޕިއްލޭގެ އަރިހަށް އިޙްތިރާމުގެ ޒިޔާރަތެއް ކުރައްވާފައެވެ. މި ބައްދަލުވުމުގައިވެސް ދެ ގައުމުގެ މަސްލަހަތު ހިމެނޭ ކަންކަމާ ގުޅޭގޮތުން މަޝްވަރާކުރެވުނެވެ.

ރާއްޖެއިން ސީޝެލްސްއަށް ކަނޑައެޅުއްވި ސަފީރު މަސްއޫދު އިމާދަކީ، މިވަގުތު ސްްރީލަންކާއަށް ރާއްޖެއިން ކަނޑައަޅުއްވާފައި ހުންނަވާ ހައިކޮމިޝަނަރުވެސް މެއެވެ. ސަފީރު މަސްއޫދު މަސައްކަތް ކުރައްވަނީ ލަންކާގައި ހުންނަ ދިވެހި ހައިކޮމިޝަނުގައެވެ.

ސީޝެލްސްއަށް ކަނޑައެޅުއްވި ސަފީރު މަސްއޫދު އިމާދު، އެގައުމުގެ ރައީސަށް ފަތްކޮޅު އަރުވައިފި

ގދ. ނަޑެއްލާގެ އިދާރީ ހިންގުމުގެ ދިގު ތާރީޚުގައި އައު ސަފުހާއެއް އުނިލުމަށް ތައްޔާރުވަމުންދާއިރު، ރަށުގެ ސިޔާސީ މަސްރަޙުން ފެންނަނީ އުންމީދީ މަންޒަރެކެވެ. ކުރިއަށް އޮތް ލޯކަލް ކައުންސިލް އިންތިޚާބުގައި ނަޑެއްލާ ކައުންސިލްގެ ރައީސާގެ މަޤާމަށް، އެ ރަށު ހިތްފަސޭހަގެ، އުމުރުން 33 އަހަރުގެ ހީވާގި ޒުވާން ކަނބަލެއް ކަމަށްވާ މާޖިދާ އަބްދުލް ކަރީމް ވާދަކުރައްވާނެކަން މިވަނީ އިޢުލާނުކޮށްފައެވެ.

މާޖިދާ މި މަޤާމަށް ކުރިމަތިލުމަށް ނިންމާފައިވަނީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ޓިކެޓުގައެވެ. އޭނާގެ މައިގަނޑު މަގުސަދަކީ އެމްޑީޕީގެ ލާމަރުކަޒީ ފަލްސަފާގެ ދަށުން، ރަށުގެ ތަރައްގީގައި ރައްޔިތުންގެ ބައިވެރިވުން އިތުރުކޮށް، ރަށުގެ އިޖުތިމާއީ އަދި އިގްތިސާދީ ހާލަތު އައު އުސްމިންތަކަކަށް ގެންގޮސްދިނުމެވެ. ޚާއްޞަކޮށް، އަންހެނެއްގެ ހައިސިއްޔަތުން މުޖުތަމައުގެ ކަންބޮޑުވުންތައް ގާތުން ބަލައި، ހުރިހާ ފަންތިއެއްގެ ރައްޔިތުންނަށް ހަމަހަމަ ފުރުސަތުތައް ހޯދައިދިނުމަކީ މާޖިދާގެ އެންމެ ބޮޑު އެއް އަމާޒެވެ.

"މި މުހިންމު މަޤާމަށް ކުރިމަތިލައި ކާމިޔާބީ ހާސިލުވުމުގައި ނަޑެއްލާގެ ލޮބުވެތި ރައްޔިތުންގެ ތާޢީދާއި އެހީތެރިކަމަކީ އަޅުގަނޑަށް ލިބޭނެ ނުހަނު ބޮޑު ހިތްވަރެއް،" މާޖިދާގެ ކެމްޕޭނާ ގުޅޭގޮތުން ވާހަކަދައްކަމުން އޭނާ ބުންޏެވެ.

އަންހެން ރައީސެއްގެ ގޮތުގައި މުޖުތަމައުގައި ހުރި ގޮންޖެހުންތަކާ ކުރިމަތިލާނީ ކިހިނެއްތޯ ސުވާލުކުރުމުން، މާޖިދާ ދެއްވީ ވަރަށް ސާބިތު ޖަވާބެކެވެ. އޭނާ ބުނި ގޮތުގައި ކޮންމެ ކަމެއްގައިވެސް ގޮންޖެހުންތައް ހުންނާނެއެވެ. ނަމަވެސް، އިސްލާމީ ރަހުމަތްތެރި އުސޫލުތަކާއި ދިވެހިންގެ ސަގާފީ އަދަބުތަކުގެ ތެރެއިން، އަންހެނުންނަށްވެސް ގައުމީ ފެންވަރުގައި އިސްދައުރެއް އަދާކުރެވޭނެކަން ސާބިތުކޮށްދޭން އޭނާ ބޭނުންވެއެވެ. އޭނާގެ ހަކަތައަކީ ރައްޔިތުންގެ އިތުބާރާއި މަސައްކަތަށް ހުރި ޝައުގުވެރިކަމެވެ.

ޒުވާނުންނާއި އަންހެނުންގެ ކުރިއެރުމަށް މާޖިދާ ގެންގުޅުއްވާ ސިޔާސަތުތަކަކީވެސް ފާހަގަކޮށްލެވޭ ކަންކަމެވެ. ޒުވާނުންނަށް ވަޒީފާގެ ފުރުސަތާއި ކުޅިވަރުގެ ވަސީލަތްތައް ހޯދައިދިނުމުގެ އިތުރުން، "ސްމޯލް ބިޒްނަސް" ނުވަތަ ކުދި ވިޔަފާރިތަކަށް މަގުފަހިކޮށްދީ، އަމިއްލަ މަސައްކަތުން އާމްދަނީ ހޯދޭނެ މާހައުލެއް ގާއިމުކޮށްދިނުމަށް އޭނާ ރާވާފައިވެއެވެ. ހަމައެހެންމެ، އަންހެނުންގެ ތަރައްގީއަށް މަސައްކަތްކުރާ ކޮމިޓީއަށް ބޭނުންވާ ބަޖެޓާއި ވަސީލަތްތައް ފޯރުކޮށްދީ، ރަށުގެ ނިންމުންތަކުގައި އަންހެނުންގެ ދައުރު ފުޅާކުރުމަކީ އޭނާގެ ވައުދުގެ މުހިންމު ބައެކެވެ.

ނަޑެއްލާގެ ރައްޔިތުން މާޖިދާއަށް ވޯޓު ދޭންވީ ސަބަބާ ގުޅޭގޮތުން އޭނާ ވިދާޅުވީ، އޭނާއަކީ އިހުލާސްތެރިކަމާއެކު ހިދުމަތް ކުރާނެ، ރައްޔިތުންގެ އަޑު އަހާނެ މީހެއް ކަމަށެވެ. "އަޅުގަނޑުގެ އަމާޒަކީ ވަކި ފަރާތަކަށް ނުޖެހި، ހުރިހާ ރައްޔިތުންނަށް އިންސާފުވެރިކަމާއެކު ހިދުމަތް ފޯރުކޮށްދިނުން. ތިޔަބޭފުޅުން ދެއްވާ ކޮންމެ ވޯޓަކީ ރަށުގެ މުސްތަގުބަލަށްޓަކައި، ހަމަޖެހުމާއި ތަރައްގީއަށްޓަކައި ދެވޭ ވޯޓެއް،" މާޖިދާ ބުންޏެވެ.

ގދ.ނަޑެއްލާގެ ދިގު ތާރީޚުގައި ފުރަތަމަ ފަހަރަށް ކައުންސިލްގެ ރައީސާކަމަށް ހީވާގި ޒުވާން ކަނބަލެއް

ފާއިތުވެދިޔަ ފަސް އަހަރު ދުވަހުގެ ތެރޭގައި އާސަންދަ ސްކީމްގެ ބޭރުން ބޭސްފަރުވާއަށް ދައުލަތުން ތިން ބިލިއަނަށްވުރެ ގިނަ ރުފިޔާ ހަރަދުކޮށްފައިވާކަން އޮޑިޓާ ޖެނެރަލްގެ އޮފީހުން ހާމަކޮށްފިއެވެ.

އޮޑިޓް އޮފީހުން މިއަދު އާންމުކުރި "ޕާފޯމަންސް އޮޑިޓް ރިޕޯޓް" ގައިވާ ގޮތުން، 2019 އިން 2024 ގެ ނިޔަލަށް ބޭސްފަރުވާގެ އެކި އެހީތަކަށް ޖުމްލަ 3,015,807,625 (ތިން ބިލިއަން ފަނަރަ މިލިއަން) އަށްވުރެ ގިނަ ރުފިޔާ ވަނީ ހޭދަކޮށްފައެވެ. މި ހަރަދުތައް އަހަރަކު އެވްރެޖްކޮށް 28 އިންސައްތައިގެ ރޭޓުން އިތުރުވަމުންދާކަން އޮޑިޓުން ފާހަގަކުރެއެވެ.

ތަފާސްހިސާބުތަކުން ދައްކާ ގޮތުގައި 2024 ވަނަ އަހަރު އެކަނިވެސް އާސަންދައިގެ ބޭރުން 872 މިލިއަން ރުފިޔާ ހަރަދުކޮށްފައިވެއެވެ. މިއީ މުޅި އާސަންދަ ސްކީމަށް އެ އަހަރު ކުރި ހޭދައިގެ 26 އިންސައްތައާ އެއްވަރުގެ އަދަދެކެވެ. އޮޑިޓުން އިންޒާރު ދީފައިވާ ގޮތުގައި، މި ރޭޓުން ޚަރަދު އިތުރުވާނަމަ 2031 ވަނަ އަހަރު އަންނަންވާއިރު އާސަންދަ ސްކީމަށްވުރެ ބޮޑު ހޭދައެއް އޭގެ ބޭރުން ކުރަންޖެހިދާނެއެވެ.

އޮޑިޓް ރިޕޯޓުގައިވާ ގޮތުން އެކި ދާއިރާތަކުން ކުރާ ހޭދަ އިތުރުވަމުންދާ މިންވަރަކީ:

ޚަރަދު ބޮޑުވާން ދިމާވާ މައިގަނޑު ސަބަބުތަކުގެ ގޮތުގައި އޮޑިޓްގައި ފާހަގަކޮށްފައިވަނީ އަމިއްލަ ހޮސްޕިޓަލްތަކުގެ އަގުތައް ބޮޑުވުމާއި، އެ އަގުތައް ކޮންޓްރޯލް ކުރަން ސިއްހީ ވުޒާރާއިން އެކަށީގެންވާ މަސައްކަތެއް ކޮށްފައި ނުވުމެވެ. މީގެ އިތުރުން، އެކި އިދާރާތަކުން އެހީ ދިނުމުގައި މަރުކަޒީ ނިޒާމެއް ނެތުމާއި، އިންޓާނަލް ކޮންޓްރޯލްތައް ބަލިކަށިވުމުގެ ސަބަބުން ނިޒާމުގެ ނަހަމަ ބޭނުން ހިފުމަށް މަގުފަހިވެފައިވާ ކަމަށްވެސް ރިޕޯޓުގައި ބުނެފައިވެއެވެ.

ޚާއްސަކޮށް ފާއިތުވި ފަސް އަހަރު އެންސްޕާއިން 1.5 ބިލިއަން ރުފިޔާ ހަރަދުކުރިއިރު، އެހީ ދެމުންދަނީ އިޖްތިމާއީ ރައްކާތެރިކަމުގެ ގާނޫނުގައިވާ ލިމިޓްތަކުގެ ބޭރުންކަން އޮޑިޓުން ފާހަގަކުރިއެވެ. އަދި ސިފައިންނާއި ފުލުހުންގެ ބޭސްފަރުވާއަށް 1.3 ބިލިއަން ރުފިޔާ ހޭދަކޮށްފައިވާކަން ވެސް ރިޕޯޓުން އެނގެއެވެ.

މި ބޮޑު ހޭދަ ކޮންޓްރޯލް ކުރުމަށްޓަކައި އޮޑިޓާ ޖެނެރަލްގެ އޮފީހުން ވަނީ ސަރުކާރަށް މުހިންމު ލަފާތަކެއް ދީފައެވެ. އޭގެ ތެރޭގައި ސިއްހީ ހިދުމަތްތަކުގެ އަގު ކޮންޓްރޯލް ކުރެވޭނެ ގާނޫނީ އޮނިގަނޑެއް އެކުލަވައިލުމާއި، ސިފައިންނާއި ފުލުހުންގެ ބޭސްފަރުވާގެ ސްކީމްތައް މުރާޖައާކޮށް ދެމެހެއްޓެނިވި ސިޔާސަތެއް އެކުލަވައިލުން ހިމެނެއެވެ. އަދި ހަގީގަތުގައިވެސް އެހީއަށް ބޭނުންވާ ފަރާތްތަކަށް އަމާޒުކޮށްގެން 'ޓާގެޓެޑް ސަބްސިޑީ' ތައާރަފުކުރުމަށްވެސް ވަނީ ލަފާދީފައެވެ.

އޮޑިޓް އޮފީހުން ބުނީ، މި ބަދަލުތައް ނުގެނެސް ދައުލަތުގެ ބޭސްފަރުވާގެ ޚަރަދުތައް ދެމެހެއްޓެނިވި ގޮތެއްގައި މެނޭޖް ނުކުރެވޭނެ ކަމަށެވެ.

އާސަންދަ ސްކީމްގެ ބޭރުން ބޭސްފަރުވާއަށް ފަސް އަހަރުތެރޭ ތިން ބިލިއަން ރުފިޔާ ހަރަދުކޮށްފި

އިންޑޮނޭޝިއާގެ ދެކުނު ސުލާވެސީ ޕްރޮވިންސްގައި ހިނގި މަތިންދާބޯޓު ވެއްޓުމުގެ ހިތާމަވެރި ހާދިސާއާ ގުޅިގެން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، އެޤައުމުގެ ރައީސް ޕްރަބޯވޯ ސުބިއަންތޯއަށް ތަޢުޒިޔާގެ މެސެޖެއް ފޮނުއްވައިފިއެވެ.

ރައީސުލްޖުމްހޫރިއްޔާ ފޮނުއްވި މެސެޖުގައި، މި ހާދިސާގެ ސަބަބުން ލިބިވަޑައިގެންނެވި ކުއްލި ސިހުމާއި ފުން ހިތާމަ ފާޅުކުރެއްވިއެވެ. މި ހާދިސާގައި 8 ކުރޫއިންނާއި، އިންޑޮނޭޝިއާގެ މިނިސްޓްރީ އޮފް މެރީން އެފެއާޒް އެންޑް ފިޝަރީޒްގެ 3 އޮފިޝަލުން ހިމެނޭހެން ޖުމްލަ 11 މީހުންގެ ފުރާނަ ވަނީ ގެއްލިފައެވެ.

ދިވެހި ސަރުކާރާއި ރައްޔިތުންގެ ނަމުގައި ރައީސުލްޖުމްހޫރިއްޔާ ފޮނުއްވި މި މެސެޖުގައި، އިންޑޮނޭޝިއާގެ ރައީސް ސުބިއަންތޯއަށާއި، އެޤައުމުގެ ސަރުކާރަށާއި ރައްޔިތުންނަށް ވަނީ ތަޢުޒިޔާ ދަންނަވާފައެވެ. ވަކިން ޚާއްޞަކޮށް، މި ހާދިސާގައި ފުރާނަ ގެއްލިދިޔަ ފަރާތްތަކުގެ އާއިލާތަކަށް ކުރިމަތިވެފައިވާ ހިތްދަތި ދަނޑިވަޅުގައި، އެ އާއިލާތަކަށް ކެތްތެރިކަން ދެއްވުމަށް އެދިވަޑައިގެން ހަމްދަރުދީ ފޮނުއްވާފައިވެއެވެ.

މީގެ އިތުރުން، މި ހާދިސާ ހިނގި ސަރަޙައްދުގައި މީހުން ހޯދުމާއި ސަލާމަތްކުރުމަށް މިހާރު ކުރިއަށްދާ އޮޕަރޭޝަން، ކާމިޔާބުކަމާއެކު ނިންމާލެވޭނެ ކަމަށް އުންމީދު ކުރައްވާ ކަމުގައިވެސް ރައީސުލްޖުމްހޫރިއްޔާގެ މެސެޖުގައި ވަނީ ވިދާޅުވެފައެވެ.

އިންޑޮނޭޝިއާއަކީ ދިވެހިރާއްޖެއާ ގާތް ގުޅުމެއް ބާއްވާ އިސްލާމީ އަޚުވަންތަ ޤައުމެކެވެ. މިފަދަ ހިތާމަވެރި ދަނޑިވަޅުތަކުގައި ރާއްޖެއިން އަބަދުވެސް އަންނަނީ އެޤައުމާ އެކު އޮތް ގާތްކަން ހާމަކުރަމުންނެވެ.

އިންޑޮނޭޝިއާގައި ހިނގި މަތިންދާބޯޓު ވެއްޓުމުގެ ހާދިސާއާ ގުޅިގެން ރައީސުލްޖުމްހޫރިއްޔާ ތަޢުޒިޔާ ފޮނުއްވައިފި

ރައްޔިތުން އިޚްތިޔާރު ކުރަންވީ ޖަވާބުދާރީ ކުރުވުމުގެ ނަމުގައި ކަންކަމަށް ހުރަސްނާޅާ، ސަރުކާރާ ގުޅިގެން މަސައްކަތް ކުރާނެ ވެރިންތަކެއް ކަމަށް ރައީސުލްޖުމްހޫރިއްޔާގެ ނައިބު އަލްއުސްތާޛް ޙުސައިން މުޙައްމަދު ލަތީފް ވިދާޅުވެއްޖެއެވެ.

ނައިބު ރައީސް މިހެން ވިދާޅުވީ ކުރިއަށް އޮތް ލޯކަލް ކައުންސިލް އިންތިޚާބުގައި ޕީއެންސީގެ ފަރާތުން މާލެ ސިޓީގެ މޭޔަރު ކަމަށް ވާދަކުރައްވާ ކެންޑިޑޭޓު މޫސާ އަލީ ޖަލީލުގެ ކެމްޕެއިން އޮފީސް ހުޅުވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.

މި ރަސްމިއްޔާތުގައި ވާހަކަފުޅު ދައްކަވަމުން ނައިބު ރައީސް ވިދާޅުވީ، މާލެ ސިޓީއަށް ދިމާވެފައިވާ ގިނަގުނަ މައްސަލަތައް ހައްލުކުރުމަށްޓަކައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަސައްކަތް ކުރައްވާ ބާރުމިނުގައި މަސައްކަތް ކުރެވޭނެ ފަދަ ވެރިންތަކެއް ހޮވުން މުހިންމު ކަމަށެވެ. މާލެ ސިޓީގެ މޭޔަރުކަން ކުރެއްވި ބޭފުޅުންގެ ތެރެއިން ރައީސް މުޢިއްޒަކީ ރައްޔިތުންގެ ބޮޑު ލޯތްބާއި އިޙްތިރާމެއް ހޯއްދަވާފައިވާ ބޭފުޅެއްކަން ފާހަގަކުރައްވައި، އެމަނިކުފާނު މާލެއަށް ތަޞައްވުރު ކުރެއްވި ކަންކަން މެނިފެސްޓޯއާ އެއްގޮތަށް މިހާރުވެސް ކުރިއަށްދާ ކަމަށް ވިދާޅުވިއެވެ.

ނައިބު ރައީސް ޙުސައިން މުޙައްމަދު ލަތީފް ވިދާޅުވީ، ސަރުކާރު ޖަވާބުދާރީ ކުރުވުމުގެ ނަމުގައި ތަރައްޤީގެ މަޝްރޫޢުތަކަށް ހުރަސްއެޅުމުގެ ބަދަލުގައި، ބޭނުންވަނީ އިޚްލާޞްތެރިކަމާއެކު ޚިދުމަތް ކުރާނެ ވެރިން ކަމަށެވެ. އަދި ސަރުކާރު ޖަވާބުދާރީ ކުރުވާނެ ފަރާތްތަކެއް (ރައްޔިތުންގެ މަޖިލިސް) ރައްޔިތުން މިހާރުވެސް އިޚްތިޔާރުކޮށްފައިވާކަން އެމަނިކުފާނު ފާހަގަކުރެއްވިއެވެ.

"އެކަންކަމަށް ކަނޑައަޅުއްވާފައިވާ ފަރާތްތައް އެތިއްބެވީ އެބޭފުޅުންގެ މަންދޫބުންގެ ގޮތުގައި އިޚްތިޔާރު ކުރައްވާފައި. އެހެންކަމުން ސަރުކާރު ޖަވާބުދާރީ ކުރުވާނީ އެދާއިރާތަކުގެ މެންބަރުން، އެ މުޢައްސަސާތަކުން. ކައުންސިލްތަކާއި ސިޓީކައުންސިލްތަކުން ބޭނުންވަނީ ސަރުކާރާ ގުޅިގެން ރައްޔިތުންނަށް ކަންކަން މަގުފަހިކޮށްދޭނެ ވެރިންތަކެއް،" ނައިބު ރައީސް ވިދާޅުވިއެވެ.

މާލެ ސިޓީގެ ތޮއްޖެހުމާއި، ޕާކިންގް މައްސަލަތަކަށް އަލިއަޅުއްވާލައްވަމުން ނައިބު ރައީސް ވިދާޅުވީ، ސަރުކާރުން ރާވާފައިވާ ކަންކަން ތަންފީޛު ކުރުމުގައި މޭޔަރުގެ ދައުރު ބޮޑު ކަމަށެވެ. ނަމަވެސް ވޭތުވެދިޔަ ދެ އަހަރު ދުވަހު އެ އެއްބާރުލުން ލިބިފައިނުވާކަން އެމަނިކުފާނު ހިތާމައާއެކު ފާހަގަކުރެއްވިއެވެ.

ނައިބު ރައީސްގެ ވާހަކަފުޅު ނިންމަވާލެއްވީ، ޕީއެންސީގެ ފަރާތުން ނުކުމެ ތިއްބެވީ ޤައުމުދެކެ ލޯބިވާ އެއް ޓީމެއް ކަމަށާއި، މާލޭގެ ތަރައްޤީއަށްޓަކައި ރައީސް މުޢިއްޒުގެ ތަޞައްވުރު ދަންނަ ލީޑަރުން ހޮވުމަށް ރައްޔިތުންނަށް އިލްތިމާސް ކުރައްވަމުންނެވެ.

ބޭނުންވަނީ ޖަވާބުދާރީ ކުރުވުމުގެ ނަމުގައި ކަންކަމަށް ހުރަސްނާޅާ ވެރިން: ނައިބު ރައީސް

ސަރުކާރުގެ "ބޯހިޔާވަހިކަން އެންމެންނަށް" ސިޔާސަތުގެ ދަށުން ގޯއްޗާއި ފްލެޓަށް އެދި ހުށަހެޅުމުގެ ފުރުޞަތު ހުޅުވާލިތާ އެއް ދުވަސްތެރޭ 500 އަށްވުރެ ގިނަ މީހުން ފޯމު ހުށަހަޅާފައިވާ ކަމަށް އިމާރާތްކުރުމާއި ގެދޮރުވެރިކަމާ ބިނާރާ ބެހޭ ވުޒާރާއިން ހާމަކުރައްވައިފިއެވެ.

ގެދޮރުވެރިކަމާ ބިނާރާ ބެހޭ ވުޒާރާއިން އާންމުކުރި އެންމެ ފަހުގެ ތަފާސްހިސާބުތަކަށް ބަލާއިރު، އިއްޔެ މި ފުރުޞަތު ހުޅުވާލި ފަހުން މިހާތަނަށް ޖުމްލަ 399 މީހަކު ވަނީ ފްލެޓަށް އެދި ފޯމު ހުށަހަޅާފައެވެ. އަދި ގޯއްޗަށް އެދި މިހާތަނަށް 119 މީހަކު ފޯމު ހުށަހަޅާފައިވާ ކަމަށް އެ ވުޒާރާއިން ވިދާޅުވިއެވެ.

މީގެ އިތުރުން، ފޯމު ހުށަހެޅުމުގެ މަރުހަލާގައި ގިނަ އަދަދެއްގެ ބަޔަކު މިހާރުވެސް ހަރަކާތްތެރިވަމުންދާކަން ފާހަގަކުރެވެއެވެ. އެގޮތުން 3,836 މީހުން ޑްރާފްޓް ސްޓޭޖުގައި ފޯމު ފުރިހަމަކުރުމުގެ މަސައްކަތް މިހާރުވެސް ކުރަމުންދާ ކަމަށް އެ ވުޒާރާގެ ތަފާސްހިސާބުތަކުން ދައްކައެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ކުރިއަށްގެންދާ މި ބިޔަ މަޝްރޫޢުގެ ދަށުން މި ބުރުގައި 15,000 ގޯއްޗާއި 7,900 ފްލެޓަށް ކުރިމަތިލުމުގެ ފުރުޞަތު ވަނީ ހުޅުވާލާފައެވެ. ފޯމު ހުށަހެޅުމުގެ ހުރިހާ ކަމެއްވެސް ކުރިއަށްދަނީ "ހިޔާވެހި" އޮންލައިން ޕޯޓަލް މެދުވެރިކޮށެވެ.

ގެދޮރުވެރިކަމާ ބިނާރާ ބެހޭ ވުޒާރާއިން ބަޔާންކުރައްވާފައިވާ ގޮތުގައި، ފޯމު ހުށަހެޅުމުގެ ކުރިން ޑްރާފްޓް މަރުހަލާގައި އޮންނައިރު ފޯމަށް ބޭނުންވާ އުނިއިތުރު ގެނައުމުގެ ފުރުޞަތު އޮންނާނެއެވެ. ނަމަވެސް، އެއްފަހަރު ފޯމު ހުށަހަޅައި ނިމުމުން އެ ފޯމެއް ކެންސަލެއް ނުކުރެވޭނެއެވެ. އަދި އުސޫލު ހަމަޖެހިފައިވާ ގޮތުން ކޮންމެ މީހަކަށްވެސް ހުށަހެޅޭނީ ފްލެޓް ނުވަތަ ގޯތި، މިއިން ކޮންމެވެސް އެއް ސްކީމަކަށެވެ.

މި ސްކީމުގެ ދަށުން ގޯއްޗަށް އެދި ހުށަހެޅުމުގެ ސުންގަޑިއަކީ އަންނަ މާރިޗު މަހުގެ 4 ވަނަ ދުވަހެވެ. އަދި ފްލެޓަށް އެދި ހުށަހެޅުމުގެ ފުރުޞަތު އޭޕްރީލު މަހުގެ 17 ވަނަ ދުވަހުގެ ނިޔަލަށް ވަނީ ހުޅުވާލާފައެވެ.

މި މަޝްރޫޢާ ގުޅޭ އިތުރު މަޢުލޫމާތާއި، ފޯމު ހުށަހަޅަންޖެހޭ އުސޫލުތަކާއި ޝަރުތުތައް ގެދޮރުވެރިކަމާ ބިނާރާ ބެހޭ ވުޒާރާގެ ސޯޝަލް މީޑިއާ މަންސަތަކުންނާއި ސަރުކާރުގެ ގެޒެޓުން މިހާރު ފެންނަން ހުންނާނެއެވެ. ސަރުކާރުގެ އަމާޒަކީ ދެފުށް ފެންނަ ނިޒާމެއްގެ ތެރެއިން ހުރިހާ ރައްޔިތުންނަށް ބޯހިޔާވަހިކަން ކަށަވަރުކޮށްދިނުމެވެ.

ފްލެޓާއި ގޯއްޗަށް އެދި އެއް ދުވަސްތެރޭ 500 އަށްވުރެ ގިނަ މީހުން ފޯމު ހުށަހަޅައިފި

މުދާ އުފުލާ ބޯޓެއް ބަންޑުން ޖަހާލުމާ ގުޅިގެން، އެ ބޯޓުން ދަތުރުކުރި ދެ މީހަކު ގެއްލިގެން ހޯދުމުގެ މަސައްކަތް އެމްއެންޑީއެފް ކޯސްޓްގާޑުން ފަށައިފިއެވެ.

އެމްއެންޑީއެފުން ވިދާޅުވި ގޮތުގައި، މިއަދު ހެނދުނު 7:27 އެހާއިރު ބަންޑުން ޖަހާލާފައިވަނީ "ބަލްމާ – 6" ނަމަކަށް ކިޔާ މުދާ އުފުލާ ބޯޓެކެވެ. މި ހާދިސާ ހިނގި އިރު ބޯޓުގައި ޖުމްލަ ހަތަރު މީހުން ތިބި ކަމަށާއި، އޭގެ ތެރެއިން ދެ މީހަކު އެ ސަރަހައްދުން ދަތުރުކުރި އެހެން ދޯންޏަކަށް ވަނީ ނަގާފައެވެ. ނަމަވެސް، ބާކީ ތިބި ދެ މީހުން އަދިވެސް ފެނިފައި ނުވާތީ، އެ މީހުން ހޯދުމުގެ މަސައްކަތް ހުއްޓުމެއް ނެތި ކުރިއަށްދާ ކަމަށް އެމްއެންޑީއެފުން މަޢުލޫމާތު ދެއްވައެވެ. ގެއްލިގެން ހޯދަމުންދަނީ ދިވެއްސަކާއި ބިދޭސީއެކެވެ.

މި ހާދިސާ ހިނގާފައިވަނީ ތާޖު އެގްޒޯޓިކާ ރިޒޯޓު ކައިރިއަށެވެ. ބޯޓު ބަންޑުން ޖަހާލި ސަރަހައްދުގައި އެމްއެންޑީއެފް މާލެ އޭރިއާ ކޮމާންޑް ކޯސްޓްގާޑު ސެކަންޑް ސްކޮޑްރަންއާއި ކޯސްޓްގާޑް ޑައިވަރުންގެ ޓީމެއް މިހާރު ދަނީ ހަރަކާތްތެރިވަމުންނެވެ.

ހުޅުމާލެއިން ފުރައިގެން ދޮންމާގާއަށް ދަތުރުކުރި މި ބޯޓު ބަންޑުން ޖަހާލުމާއެކު، ބޯޓުގައި ހުރި ބައެއް ތަކެތި ކަނޑަށް އޮޔާދާތީ، އެ ސަރަހައްދުން ދަތުރުކުރާ އުޅަނދުފަހަރުގެ ދަތުރުވެރިން ސަމާލުކަން ދެއްވުމަށް އެމްއެންޑީއެފުން ވަނީ އިލްތިމާސްކުރައްވާފައެވެ. ކޯސްޓްގާޑުން ލަފާކުރާ ގޮތުގައި މި ތަކެތި އޮޔާދަނީ ހުޅަނގު ފަރާތަށެވެ.

ޙަބަރު

މާލެ ތެރެއަށް ބުޅަލުގެ ނަޖިސް އެޅެން ދުލެއް ނުކުރާނަން، ފެސިލިޓީ ހަވާލުކުރަން 2 ފަހަރަށް އެދެފިން: މޭޔަރު

މާލެއާއި ހުޅުމާލޭގެ ފެނުގެ ވިއުގަ އެމަރޖެންސީގައި ބޭނުން ކުރެވޭ ވަރަށް ނިމިއްޖެ

އަމްބާނީގެ ދެމަފިރިން އަނެއްކާވެސް ރާއްޖޭގައި: މިފަހަރު ޗުއްޓީ ހޭދަކުރަނީ އިތާފުށީގައި

މިއަހަރު ގްރޭޑް އެކަކަށް ވެއްދި ދަރިވަރުންގެ އަދަދު 4،000 އަށްވުރެ މައްޗަށް!

ވައުދުވުމާއި އޭގެ އަމާނާތްތެރިކަން: އިސްލާމީ ނަޒަރަކުން

ވައުދުވުމާއި އޭގެ އަމާނާތްތެރިކަން: އިސްލާމީ ނަޒަރަކުން

ސީޝެލްސްއަށް ކަނޑައެޅުއްވި ސަފީރު މަސްއޫދު އިމާދު، އެގައުމުގެ ރައީސަށް ފަތްކޮޅު އަރުވައިފި

ގދ.ނަޑެއްލާގެ ދިގު ތާރީޚުގައި ފުރަތަމަ ފަހަރަށް ކައުންސިލްގެ ރައީސާކަމަށް ހީވާގި ޒުވާން ކަނބަލެއް

އާސަންދަ ސްކީމްގެ ބޭރުން ބޭސްފަރުވާއަށް ފަސް އަހަރުތެރޭ ތިން ބިލިއަން ރުފިޔާ ހަރަދުކޮށްފި

އިންޑޮނޭޝިއާގައި ހިނގި މަތިންދާބޯޓު ވެއްޓުމުގެ ހާދިސާއާ ގުޅިގެން ރައީސުލްޖުމްހޫރިއްޔާ ތަޢުޒިޔާ ފޮނުއްވައިފި

ބޭނުންވަނީ ޖަވާބުދާރީ ކުރުވުމުގެ ނަމުގައި ކަންކަމަށް ހުރަސްނާޅާ ވެރިން: ނައިބު ރައީސް

ފްލެޓާއި ގޯއްޗަށް އެދި އެއް ދުވަސްތެރޭ 500 އަށްވުރެ ގިނަ މީހުން ފޯމު ހުށަހަޅައިފި

ބޯޓެއް ބަންޑުންޖަހާލައި، ދެ މީހަކު ގެއްލިގެން ހޯދަން ފަށައިފި